- 265 -

1369. Okt. 20. Liegnitz.

Herzog Ludwig bestätigt, dass auf Klage der Rathmannen zu Liegnitz der lange Rymme den Salzmarkt auf seinem Gute Crayow nicht erwiesen und deshalb abzustellen gelobt hat.

Wir Ludwig von gots gnaden herczog in Slesien herre zum Brige vnd vormunde zu Legnicz der irlauchten fursten Ruprechts, Wenczlaus, Boleslaus vnd Heinrichs gebrudere, auch herczog in Slesie vnd herren zu Legnicz, vnsirn liben vettirn, bekennen offintlich allen den, dy disen briff sehen, horin adir lesen, das vnsere liben vnd getrawen ratmanne zu Legnicz Hertil Bowdswoy vnd den Langin Rymen gepfant hatten, vmb das, das sy vff irem gute zu Crayow hatten salcz lassen vorkeuffen, gleich als mans vff dem markte zu Legnicz vorkeufft. Des beschide wir den selben Hertil vnd Langin Rymen vor vns, das sy beweysin sulden, was sy rechtis hetten zu dem salczmarkte vff iren gute. Des qwam vor vns der selbe Lange Ryme von seyner weyn vnd ouch von des selben Hertels weyn darnach vnd brochte mit ym Thammen Rymberg, der yn das gut vorkaufft hatte, vnd wolde mit ym beweysen, das man von aldirs do salcz hette vorkaufft. Des mochte der selbe Thamme kein redliche beweysunge nicht gehaben, also das vnse man sprochen, sy mochten mit rechte keinen salczmarkt vff irem gute gehaben. Dor vmb globte derselb Lange Rymen von seyner vnd von des genanten Hertils weyn, das sy nymmer mer salcz vff irem gute weiden lassin vorkewffen vnd vorczeich sich von ir beydir weyn alles des rechten, daz sy dorczu gehaben mochten vnd wilkorte darzu, ab ymmerme salcz vff irem gute wurde vorkaufft, das vnse ratmanne zu Legnicz dar vmb thun sullen, waz recht ist. Des habe wir zu bestetung diser sache desen briff vorsigelt. Gegeben mit der egenanten vnsern vettirn ingesegil zu Legnicz an dem sunnobende noch sente Hedwigen tag, nach gotis geburt tausent dreyhundert iar in dem newnundsechczigsten iare. Do bey sein gewest Heinrich von Rechinberg, Hannos von Slewicz, Steffan Trache, Ditthrich von Redirn vnd andire vil trewwirdiger lewte.

Bitschens Prwilegb.f. XLII.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866