- 147 -

1216 Februar 5, Rom.

Papst Innozenz III. nimmt das Zisterzienserinnenkloster Trebnitz in seinen Schutz und bestätigt ihm die Besitzungen und Rechte.

Or. dep. südl. Perg. Breslau St.A. Rep. 125 Nr. 17 (A).
Haeusler Nr. 25; Mal. 2, Nr. 174. - SR 171 b; Potthast 5066; Appelt, Urkundenfälschungen 124, Nr. 18.
Inkarnationsjahr 1215 nach dem calculus Florentinus. Indiktion III statt IIII findet sich auch in Potthast 5056. Damit erledigt sich die von Schilling S. 581 Anm. 1154 hinsichtlich der Datierungsangaben aufgeworfene Frage. - Über die Zugehörigkeit des Klosters zum Zisterzienserorden vgl. Appelt Z. 71, S. 45 ff. Zu den Ortsnamen vgl. Engelbert, Schles. Geschichtsblätter 1918, Nr. 3, S. 61 ff. und Gottschalk, DQ 31, 1930, 191.

INNOCENTIUS EPISCOPUS SERVUS SERVORUM DEI DILECTIS IN CHRISTO FILIABUS . . ABBATISSE AC MONIALIBUS DE TREBNIZ TAM PRESENTIBUS QUAM FUTURIS REGULAREM VITAM PROFESSIS IN PERPETUUM. Religiosam vitam eligentibus apostolicum convenit adesse presidium, ne forte cuiuslibet temeritatis incursus aut eos a proposito revocet aut robur, quod absit, sacre religionis infringat. Eapropter dilecte in Christo filie vestris iustis postulationibus clementer annuimus et monasterium de Trebniz, in quo divino estis obsequio mancipate, sub beati Petri et nostra protectione suscipimus et presentis scripti privilegio communimus. In primis siquidem statuentes, ut ordo monasticus, qui secundum deum et beati Benedicti regulam atque institutionem Cistertiensium fratrum in eodem monasterio institutus esse dinoscitur, perpetuis ibidem temporibus inviolabiliter observetur. Preterea quascumque possessiones, quecumque bona idem monasterium impresentiarum iuste ac canonice possidet aut in futurum concessione pontificum, largitione regum vel principum, oblatione fidelium seu aliis iustis modis prestante domino poterit adipisci, firma vobis vestrisque sucessoribus et illibata permaneant. In quibus hec propriis duximus experimenda vocabulis: locum ipsum, in quo prefatum monasterium situm est, cum omnibus pertinentiis suis, possessiones, quas habetis in Zlesia Wangrinowo, Martinouo, Clissouo, Rozerouo, Iohannis Britii. Zulizlauic, Malussino, Rassouo, Brokotino, Chothouici, Ozorouici, Pangouo, Biscupici, Benicouo, Iauichouo , Paulouo, Laziz, Probostougai cum omni iure, decimis et pertinentiis suis, decimam de Stobno, decimam de Stinau et decimam de Ostrouci cum pratis, vineis, terris, nemoribus, usuagiis et pascuis, in bosco et piano, in aquis et molendinis, in viis et semitis et omnibus aliis libertatibus et immunitatibus suis. Sane laborum vestrorum, quos propriis manibus aut sumptibus colitis, de possessionibus habitis ante concilium generale sive de ortis et virgultis et piscationibus vestris vel de nutrimentis animalium vestrorum aut etiam de novalibus nullus a vobis decimas exigere vel extorquere presumat. Ad hec liberas et absolutas personas e seculo fugientes liceat vobis in monasterio vestro ad conversionem recipere et eas absque contradictione aliqua retinere. Prohibemus insuper, ut nulli sororum vestrarum post factam in monasterio vestro professionem fas sit sine abbatisse sue licentia de eodem loco discedere. Discedentem vero absque communium litterarum vestrarum cautione nullus audeat retinere. Illud districtius inhibentes, ne terras seu quodlibet beneficium ecclesie vestre collatum liceat alicui personaliter dari sive alio modo alienari absque consensu totius capituli vel maioris aut sanioris partis ipsius. Si que vero donationes vel alienationes aliter quam dictum est facte fuerint, eas irritas esse censemus. Pro consecrationibus vero altarium vel ecclesiarum sive pro oleo sancto vel quolibet ecclesiastico sacramento nullus a vobis sub obtentu consuetudinis vel alio modo quicquam audeat extorquere, sed hec omnia gratis vobis episcopus diocesanus impendat. Alioquin liceat vobis quemcumque malueritis catholicum adire antistitem gratiam et communionem apostolice sedis habentem, qui nostra fretus auctoritate vobis quod postulatur impendat. Quodsi sedes diocesani episcopi forte vacaverit, Interim omnia ecclesiastica sacramenta a vicinis episcopis accipere libere et absque contradictione possitis, sic tamen, ut ex hoc in posterum propriis episcopis nullum preiudicium generetur. Porro si episcopi vel alii ecclesiarum rectores in monasterium vestrum vel personas inhibi constitutas suspensionis, excommunicationis vel interdicti sententiam promulgaverint sive etiam in mercennarios vestros pro eo, quod decimas sicut dictum est non persolvitis, sive aliqua occasione eorum, que ab apostolica benignitate vobis indulta sunt, seu benefactores vestros pro eo, quod aliqua vobis beneficia vel obsequia ex caritate prestiterint vel ad laborandum adiuverint in illis diebus, in quibus vos laboratis et alii feriantur, eandem sententiam protulerint, ipsam tamquam contra sedis apostolice indulta prolatam duximus irritandam. Nec littere ille firmitatem habeant, quas tacito nomine Cistertiensis ordinis et contra tenorem apostolicorum privilegiorum constiterit impetrari. Preterea cum commune interdictum terre fuerit, liceat vobis nichilominus in vestro monasterio exclusis excommunicatis et interdictis divina officia celebrare. Paci quoque et tranquillitati vestre paterna in posterum sollicitudine providere volentes auctoritate apostolica prohibemus, ut infra clausuras locorum seu grangiarum vestrarum nullus rapinam seu furtum facere, ignem apponere, sanguinem fundere, hominem temere capere vel interficere seu violentiam audeat exercere. Preterea omnes libertates et inmunitates a predecessoribus nostris Romanis pontificibus ordini vestro concessas nee non libertates et exemptiones secularium exactionum a regibus et principibus vel aliis fidelibus rationabiliter vobis indultas auctoritate apostolica confirmamus et presentis scripti privilegio communimus. Decernimus ergo, ut nulli omnino hominum liceat prefatum monasterium temere perturbare aut eius possessiones auferre vel ablatas retinere, minuere seu quibuslibet vexationibus fatigare, sed omnia integra conserventur eorum, pro quorum gubernatione ac sustentatione concessa sunt, usibus omnimodis profutura, salva sedis apostolice auctoritate. Si qua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit, secundo tertiove commonita, nisi reatum suum congrua satisfactione correxerit, potestatis honorisque sui dignitate careat reamque se divino iudicio existere de perpetrata iniquitate cognoscat et a sacratissimo corpore ac sanguine dei et domini redemp-toris nostri Iesu Christi aliena fiat atque in extremo examine districte ultioni subiaceat. Cunctis autem eidem loco sua iura servantibus sit pax domini nostri Iesu Christi, quatinus et hie fructum bone actionis percipiant et apud districtum iudicem premia eterne pacis inveniant. AMEN. AMEN.
(Rota) Ego Innocentius catholice ecclesie episcopus ss. (BV)
+ Ego Nicholaus Tusculanus episcopus ss.
+ Ego Guido Prenestinus episcopus ss.
+ Ego Hugo Ostiensis et Welletrensis episcopus ss.
+ Ego Benedictus Portuensis et sancte Rufine episcopus ss.
+ Ego Pelagius Albanensis episcopus ss.
+ Ego Cinthius tituli sancti Laurentii in Lucina presbiter cardinalis ss.
+ Ego Cencius sanctorum Iohannis et Pauli presbiter cardinalis tituli Pamachii ss.
+ Ego Leo tituli sancte Crucis in Iherusalem presbiter cardinalis ss.
+ Ego Petrus sancte Pudentiane tituli Pastoris presbiter cardinalis ss.
+ Ego Guala sancti Martini presbiter cardinalis tituli Equitii ss.
+ Ego Robertus tituli sancti Stephani in Celio monte presbiter cardinalis ss.
+ Ego Guido sancti Nycolai in Carcere Tulliano diaconus cardinalis ss.
+ Ego Gregorius sancti Theodori diaconus cardinalis ss.
+ Ego Octauianus sanctorum Sergii et Bachi diaconus cardinalis ss.
+ Ego Johannes sanctorum Cosme et Damiani diaconus cardinalis ss.
+ Ego Petrus sancte Marie in Aquiro diaconus cardinalis ss.
+ Ego Bertrannus sancti Georgii ad Uelum Aureum diaconus cardinalis ss.
Datum Laterani per manum Thome sancte Romane ecclesie subdiaconi et notarii Neapolitani electi, non. febr., indictione III, incarnationis dominice anno M°CC°XV°, pontificatus vero domini INNOCENTII pape III anno octavodecimo.

Bleibulle an Seidenschnüren.

Schlesisches Urkundenbuch, Herausgegeben von der Historischen Kommission für Schlesien, Zweiter Band: 1. Lieferung 971 - 1216, 1963; 2. Lieferung 1217 - 1230, 1968; 3. Lieferung Fälschungen und Register, 1971; Bearbeitet von Heinrich Appelt, Verlag Hermann Böhlaus Nachf., Wien-Köln-Graz