- 3 -

1291 Januar 17, Olmütz.

Die Brüder Mesco und Boleslaus, Herzöge von Oppeln, schließen ein Verteidigungs- und Schutzbündnis mit Wenzel II., König von Böhmen und Markgraf von Mähren.

Insert in Notariatstranssumpt von 1341 Sept. 1, Prag SUA ACK (B).
Fiedler AÖG 14, 1855, S. 173 f. Nr. I = Emler, Regesta 2. Nr. 1530 (Teildruck); Grünhagen-Markgraf, Lehnsurkunden 2. S. 300-302 Nr. 3; Archivum coronae regni Bohemiae I Nr. 41. - Kopetzky, AÖG 45, 1871. S. 142 Nr. 162; SR 2179; Koss, Katalog listin Nr. 38.
Diktat der Empfängerkanzlei ist wahrscheinlich, vielleicht kommt aber auch die Kanzlei des Bischofs von Olmütz in Betracht.

Nos Mesco et Boleslaus fratres dei gracia duces Opolienses notum facimus universis presentes litteras inspecturis, quod nos in presencia excellentissimi domini Wenczeslai incliti regis Bohemie et marchionis Morauie constituti nostre sibi devocionis obsequia promptis affectibus offerentes libere et spontanee promisimus in aquisicione, prosecucione ac defensione iurium, terrarum et bonorum ipsius domini regis ipsum dominum regem iuvare in omnem eventum contra quemlibet principem et omnem hominem nulla persona excepta, quilibet nostrum in persona propria cum omnibus suis hominibus et tota sua potencia pro cunctis suis viribus et pro posse, omni occasione, fraude et dolo exclusis. quandocumque et quocienscumque per eundem dominum regem vel suos ex parte sua divisim vel communiter fuerimus requisiti, ita tamen, quod, dum eundem dominum regem in persona propria ad expedicionem aliquam continget procedere, nos ambo vel unus nostrum, si alter legittimo fuerit inpedimento detentus, assumptis secum utriusque hominibus omnibus in subsidium ipsius domini regis venire tenebimur, sicut superius continetur: dum vero ipse dominus rex non procedet personaliter, set suos homines cum suo capitaneo ad expedicionem vel reysam transmittet, tunc nos eciam non in persona propria procedere, set nostros homines cum predicti domini regis hominibus transmittere tenebimur, nisi nos, ut in persona propria procedamus, specialiter ipse dominus rex duxerit requirendos, et tunc nos ambo vel alter nostrum cum hominibus utriusque tenebimur procedere loco et vice predicti domini regis, sicut fuerimus requisiti, hoc expresso eciam, quod, cum versus terras Boemie, Morauie, Polonye, Slezie, Cracowie, Sclauie vel earum aliquam venire ipsi domino regi in subsidium nos continget, nulla nobis proinde ipse dominus rex stipendia nec aliqua necessaria tenebitur exhibere, cum vero versus alias partes. Vngarie videlicet, Teutunie vel Alemanie, in eiusdem domini regis subsidium venerimus, tunc, prout duobus ex parte ipsius domini regis et duobus ex parte nostra baronibus ad hoc specialiter deputatis videbitur, ipse dominus rex nobis tenebitur in aliquo subvenire. Promisimus preterea et tenemur eundem dominum regem et suos homines in terris et municionibus nostris recipere dando sibi et suis hominibus ingressum in eas liberum, moram necessariam et egressum pacificum ex eisdem, sicut et quando ac quocienscumque ipsi domino regi et suis hominibus visum fuerit oportunum. Que omnia et singula supradicta nos servare promisimus et implere firmiter fide data et in ligno crucis dominice corporali prestito iuramento. Ipse autem dominus rex volens erga nos suis, ut premittitur, serviciis obligatos innate sibi ad suos graciam benignitatis ostendere nos a quibuslibet indebitis gravaminibus benivole defensabit et, si per nostrum auxilium aliquas terras favente domino evincet ipse dominus rex vel aquiret, nos proinde graciose remunerare promisit et nichilominus nobis benigne favebit de hiis, que ad nos in terris eisdem de iure constiterit et legittime pertinere. Insuper, ut nos serviciis domini regis predicti libencius et intrepide exponamus, si nos ambos vel nostrum alterum, quod absit, in bello ipsius domini regis peragendo servicia per adversarios eius contingeret captivari, a captivitate huiusmodi ipse dominus rex suis sumptibus vel aliter, sicut potent, nos exsolvet, set ad resarcienda dampna alia, si que nos vel nostri homines in ipsius domini regis servicio receperimus, ipse dominus rex se nec obligat nec tenetur. Ceterum, si cum aliquo ex principibus Polonie, contra quem nobis vel nostrum alteri aliqua conpetit accio vel questio, ipse dominus rex ad conposicionem vel concordiam veniret, eidem concordie ipse dominus rex taliter nos includet, quod accio seu questio ipsa inter nos et eundem principem exorta ipsius domini regis ab utraque parte decisioni comittatur et decidatur per ipsum dominum regem iusticia vel amore: cuius decisioni seu mandato obedire volumus et parere. Item, si nos ambo vel alter nostrum occasione serviciorum, que prefato regi exhibebimus, alicuius principis ingratitudinem forsitan incurremus, ipse dominus rex, si cum eodem concordabit principe, eidem concordie nos includet. In quorum omnium testimonium et robur firmiter valiturum presentes litteras dedimus sigillorum nostrorum appensione munitas. Actum et datum in Olomucz hiis testibus presentibus, videlicet venerabilibus in Christo patribus dominis Arnoldo Babenbergensis et Teodrico Olomucensis ecclesiarum episcopis et illustribus Kazimiro de Bytun et Nycolao Oppauie ducibus et honorabilibus viris fratre Gotfrido de Glyngenvels magno preceptore domorum hospitalis sancti Iohannis Ierosolimitani per Almaniam, Bernharde Misnensis, Iohanne Wyssegradensis et magistro Iohanne Sacensis ecclesiarum prepositis et pluribus aliis vocatis ad hoc specialiter et rogatis, anno domini millesimo ducentesimo nonagesimo primo, sextodecimo kalendas februarii, indiccione quarta.