- 36 -

1340. August 22.

Nycolaus dei gracia Oppauie et Rathoworie dux Omnibus imperpetuum. Conditor universe creature deus ineffabilis sue pietatis thezauros suis dispensat fidelibus, manumque plenam misericordie operibus expandit ad premia graciarum; eos siquidem quos in virtutum exercicio et amoris desiderio fervenciores invenit atque priores agnoscit excellencia meritorum, amplioris benediccionis sue prevenit beneficijs et coronat stipendio bravij largioris. Sane cum in hijs ad eterni principis exemplar nostros actus conformare et dirigere studiosius intendamus, licet ex liberalitate ducali universas Ecclesias, quas auctore domino per quem reges regnant et principes optinent principatus, patrocinio ducali contuemur, nostri favoris brachijs generaliter amplectamur et in cuiuslibet promocionis prosecucione ac defensionis presidio earumdem sollicitudine diligenti et devocione sollicita vigilemus: Tamen quibusdam ex ipsis utpote Ecclesie et Monasterio Sancti spiritus, sancte Marie et beati Johannis Ewangeliste in Civitate nostra Rathowor situato, Religiosarum nobis in Cristo dilectarum, sororis nostre Serenissime domicelle Domicelle Eufemie, quondam germane felicis memorie Incliti principis domini Lesconis ducis Rathoworiensis predecessoris et sororij karissimi, et filiabus nostris dilectis Elizabeth, Agnes et Anne, necnon devotis Priorisse et sanctimonialibus in eodem Monasterio degentibus, divini cultus aliaque caritatis opera, quibus tamquam gradus ascensionis ad veri Salomonis reclinatorium ascenditur et sancta Mater Ecclesia in filiorum operibus delectatur, studiosius ac devocius peragantur, uberioris dileccionis graciam inpertimur et interiores amplexus specialius admisimus cordis nostri, In eo equidem boni emulatores Serenissimorum predecessorum nostrorum evidencius existendo, qui eciam idem Monasterium fundaverunt et foverunt uberibus gracie multiformis pre ceteris dileccionis privilegio singularis. Nos igitur racionis intellectu perspicacius intuentes, quod affectus ex effectu colligitur et quod interioris mentis est expositor actus extra, ut nostra dileccio quam ad pretactum gerimus Monasterium appareat evidencius operis argumento, ac eciam singularem amorem et dileccionem, quem predicte Inclite domicelle Eufemie et nostris filiabus prenotatis ex merito gestari dinoscimur intuentes, oppidum Bawrob cum hijs villis scilicet Sulcau, Czirbenkau et Dghehilob et omnibus pertinencijs et appendijs suis seu eorum, vero empcionis tytulo per dictam domicellam sororem nostram karissimam pro suis denarijs conparatum vel conparatis a Nobilibus viris Henrico de Plumnav et eiusdem germano, fratre Ordinis domus Theuthunice, prout ex litteris eorum super hac vendicione, empcione ac protestacione confectis plenius didicitur et aparet, omni Jure quo ipsi possiderunt et tenebant, nostrum benignum huic vendicioni et empcioni prebentes assensum, Volumus ut eedem domicella Eufemia seu filie nostre predicte, quecunque alteri succedente, vel eisdem non existentibus Priorissa et conventus dicti Monasterij Jure aliorum bonorum monasterialium Terre nostre Oppauiensis tenere debeant in antea et iuxta consuetudinem ceterorum claustralium habilitatem et scienciam perpetuis temporibus possidere. Omnia Jura et servicia que nobis in eodem seu eisdem conpetunt, preterquam consuetudinaria claustralium ut premittitur, Quindecim tamen Marcas graves annuatim nobis dandas pro servicijs unius Dextrarii dat. et observat. actenus per dictorum bonorum possessores, ad instanciam amorisque dileccionem sepedicte domicelle et filiarum nostrarum ac potissime propter deum ad utilitatem et ampliorem profectum ei vel eis dominabusque prefatis in prenominato Claustro Rathiworiensi degentibus tenore presencium relaxamus, resignavimus libenter et liberaliter resignamus, Volentes ut exnunc ipsa bona prenominata possidere perpetuo debeant pacifice et quiete, nec easdem aliquis racione dictorum bonorum inpetere nec inquietare ullo umquam tempore audeat vel presumat cum omnibus Juribus et utilitatibus ac proventibus suis perpetuis temporibus ad dictum Monasterium seu claustrum virginum in Rathowor pertinentibus, ratum gratum et confirmatum habentes volumus et affectamus ab omnibus inviolabiliter observari. In cuius Rei Testimonium presentes Litteras fieri fecimus et Sigillo nostro Maiori munimine roborari. Actum in Rathowor, Castro nostro ducali, In presencia Nobilium et discretorum nobis fidelium, Dgheczconis, Curie nostre Rathoworiensis Judicis, Miscziconis dicti Körnicz, Wernheri longi de Warutzwerde, Petri Razsicz, Waltheri de Fullen, Heynconis de Lübsicz, Borsuthe de Herrolticz, Camerarii Zude terre nostre Oppauiensis, et Chunatonis dicti Slüsser de Nysa, in testimonium premissorum, Et datum per manus Prothonotarii et fidelis nostri Frenczlini Cristani de Praga. Sub anno ab incarnacione domini Millesimo Trecentesimo Quadragesimo, In Octava Assumpcionis virginis gloriose.

Anhangend an rother Seide das Reitersiegel des Herzogs mit der Umschrift: SIGILLVM. NICOLAI. DEI. GRACIA. DVCIS. OPPAVIE. und auf dem Rucksiegel: S. NICOLAI. DVCIS OPAVIE. ET. RATIBORIE. Eine alte Beschreibung des Siegels giebt das Transsumt N. XL.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.