- 336 -

Ohne alle Angaben.

Schreiben des liegnitzer Rothes an Herzog Ludwig von Brieg in Angelegenheit des liegnitzer Bürgers Paul Schoneione.

Hochgeborner furste, genediger liber herre. Alz euwer gnade vns vorschrebin hat von Pauwel Schoneione der stat dibe czu Legnicz, wy daz her mit vns vor euwer gnade adir vor welche stat yn Slezien adir in Polenisschem lande wir kisen, komen wolle, dorobir antworte wir euwern gnaden, daz wir gewest syn yn vil erberr steten, von den wir vndirwyset syn, daz wir eyme sulchen worhafftigen dibe nicht pflichtig syn noch czu czihen yn keyn land noch yn keyne stat, auch hat vns euwer gnade geschreben, wy daz wir in scheiden, dorobir thun wir euwir gnaden czu wissen, daz wir in ny geschulden haben noch scheiden, sundir in geczigen haben vnd noch czyhen vnd auch wie wir wissen, daz her eyn worhafftiger dib ist der stat Legnicz, das wir mit dem rechten volfurt haben, alz recht ist. Auch habit ir vns geschreben, daz ir allen steten briue senden wollit vnd daz recht vor in biten, alz vor eynen gerechten, dorumme wisse euwer gnade, daz wir auch allen erbern steten briue senden wollen vnd si beten, daz si euwer gnade beten vnd vndirwyzen, daz ir vns eyn recht laset wedirvarn, alz is eyne iczliche erber stat pflegit czuhalden kegen der andirn vm vnsern worhafftigen dib. Auch liber herre hat euwer gnade vns vorschreben, daz ir in by euwer manne recht behalden wollit vnd mogit des nicht gelasen sint der czyt, daz in vnser gnediger liber herre, herczog Ruprecht an euch bracht hat, alz eynen gerechten. Dorobir antworte wir euwirr gnaden, alz euch vnser gnediger liber herre H. R. nv nehst kegen Grotkaw vm diselben sachen geschreben hat, czu der czyt, do her in an euwer gnade brachte vnd vor in bat czunemen yn euwer keschirmms, do wisste der obgenannte vnser herre dennoch syner bosheit vnd vntrauwe nicht, alz her si sidirmols worhaffticlichen hat deruarn vnd des vndirwyset ist, alz her euch das wol geschreben vnd geoffenbart hat yn syme briue.

O. d. St. L. No. 164, ohne Siegel, Auf- und Unterschrift.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866