- 592 -

Ohne Jahr. 1429 ?

Vnsirn fruntlichen grus zuvor. Liebir her houptman vnd liebin frunde. Wir haben vnsern reissigen geczug ken Strelin in die stat gelegit ken den ketczern, die uff Nymptsch legen vnd meinen einen reytenden krig mit in eine czeit anczuslahen vnd czuhalden durch der lande bestes vnd beschirmunge willen, vns allen vnd euch zugute vnd zufromen vnd dovon so bitten wir euch fruntlichen vns hundert pferde gutes vnd tochtiges folkes zu hulffe zusenden vnd ouch ewern herren herczoge Ludwig zubitten, das vns seine gnade ouch hundert pferde reissiges folkes zuhulffe senden vnd leyen welle, uff das wir den bosen ketczern dester bas mochten widerstehen vnd die lande vor in geschutczen vnd begeren des wider ewer vorschreben antwort. Geben des dinstagis noch Dyonisy. . .
Ratmanne der Stat Breslaw.
Aufschrift: Dem erbern vnd woltochtigen Petir Schiraw houptman czu Legnicz vnd den erbern vnd weysen .. ratmaunen doselbist vnsern lieben frunden.

O. d. St. L. No. 334. Auf Papier, mit erhaltenem ausgepresstem breslauer Stadtsiegel.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866