- 782 -

Ohne Angaben von Zeit und Ort. (1454).

Wir Hedwig von gotes gnaden im Slezien herczogynne vnd frawe zu Legnicz vnd zum Goltberge etc. von vnsern vnd ganczir voller macht als eyne rechte, naturliche, angeborne vormunde vnd von landen vnd steten vffgenomene vorweserynne des hochgebornen fursten vnd hern herczoge Ffrederichs vnsers allerliebsten sones bis zu seinen bescheidenen vnd mundigen iaren sampt mit den vorsuchtigen, weysen burgermeistern, rathmannen vnd aller geschwornen, steten Goltberg vnd Haynaw vnsern lieben getrawen bekennen vffentlichen mit dezim brieffe allen den, die en zehin, horen adir lezin, alzo alz die vorsichtigen burgermeister, rathmannen, eldisten, geschworen, hantwergmeister vnd die gancze gemeyne der stad Legnicz vnsere liebin getrawin vnserem obgenanten liebin sone mannen vnd steten Goltberg vnd Haynaw die forderunge der peinlichen schauld zu Ambrosio Pitschin erem gefangenen entrewmet habin vnd rechtes helffin wollen vff sulche peynliche schauld, so globin wir obgenante frawe Hedwig von des egenanten vnsers lieben sones wegin bey vnsern furstlichen trawen vnd wir obgenante stete Goltberg vnd Haynaw bey vnsern guten trawen vnd eren, das sulche obgenante rechtes helffunge vni auch forderunge den vorgenanten burgermeister, rathmanne, eldesten, geschwornen, hantwergmeistern vnd der ganczin gemeyne arm vnd reich der egenanten stad Legnicz, die iczund sind adir en zukomfftigen czeiten seyn werden, an erem rechten vnd gerichten auch an iren eren vnd gelympfen gancz vnschedlichen sal seyn vnd wollen, das der obgenante vnser liber son vnd herre das sal obir sich nemen vnd mit vnsern mannen vnd steten das vorantworten, so is den landkondig vnd vffinbar ist, das vnserm lieben sone vnd herren vnd den vnseren rechtes not zu em thut.

O. d. St. L. No. 427. Ohne Siegel und Pergamentstreifen.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866