- 306 -

1377 [Wrocław].

Stary wrocławski porządek budowlany z uzupełnieniami etc.

1. Wer do mwirn wil, der sal is synen nokebwr lossin wissen vor den rathmann oder sus mit czweyen nokebwrn ein virteil iaris dovor, die sullen di mwir legin vf ir beidir erbe vnde sollen di euch beidirsyt czugen vmme ir geld vnde nůczen.
2. Lysse hers in abir nicht wissen, so sal her im des geldis tag geben dornoch alz her anhvbe czu mwirn ein virteil iaris.
3. Spreche ouch ir eynir, her vormochte syn nicht, daz di ratmanne koren, so solden di rathman di mwir schaczen, vnde dovon so sal her im denne gebin eynen ierigen czins, also lange, bis hern im abegekeufen mag.
4. Wer ouch, ob ir eynir ein gadim vber der erden mwirn welde, das sal im sin nokebwr helfen mwirn, alz vorgesprochen ist.
5. Welde ouch ir eynir hohir mwirn, den das gadim vbir der erden, vnde der andir důrfte sin nicht oder vormochte sin nicht, so sal dirre di gancze mwir vorbas vfmwirn, wi hoch her wil, mit syme eygene gelde, vnde sal das gerynne legen glych in di mitten der mwir vnde syme nokebwr lossin eynen rwm vf der mwir, do eyne mwir latte gelegin moge, do syn gesperre vffe ste; also ob der nokebwr odir syne nochkomelinge des hernoch czu rate worden, ouch ire mwir vfczuvůren, daz in beide, gerynne vnde rwm, czu der mwir latten czu nucze komen.
6. Wer ouch, ob der nokebwr di mwir mitenuczen welde, her mwirte doran oder nicht, so sal her di mwir helfen gelden glichirwis als vor.
Wer ouch, ob ein man von nwes mwirn welde an ein ald gemwirde sins nokebwrs, das gar vf des selbin sins nokebwrs erbe lege, der sal im di alde mwir halp gelden von grunde vf vnde mitenuczen also manchis gadims hoch, alz her doran mwirt vnde nuczit, vnde das erbe, do di mwir vffe stet, sal der nokebwr kegin disem vorsehen vmme sust.
7. Vbir alle dy vorbeschrebene rede, eyn man mwir hoch odir nydir, vorne odir hindere in sime hofe, kisen di rathmanne, daz eyme syne mwir vnde gebwde nůczir sye, denne deme andern, das sullen sye abir achten vnde schaczen, daz eyme glich geschee alz deme andern.
Actum anno LXXVII (f 179).
8. Wir habin vbireyne getragin, welch man mvyrn wil in sinen hofe vnde vf dy mvyr buwin wyl, vnde sin nokebuyr darf nicht me den eynyr scheidemvir, so sal der dy mvyr legin vf sins nakebwirs erbe andirhalbin czigil vndir der erdin vnde vber der erdin eynen czigil acht elin hoch, vnde sin nakebuwir darf ym czu der czit nicht me den 1½ czigil vndir der erdin vnd eyn czigil vbir der erdin acht elin hoch an der selbin mvyr geldin, wurde abir der nakebuyr adir syne geerbin her noch dy mvyr gliche nuczin, so muste her daz vberige an der mvyr vnde ouch an dem erbe geldin noch der stat saczunge.
9. Welde ouch eyn man mvyrn in syme hofe an sins nakebuyrs durchuart, alzo daz syme nakebwir dy durchuart geengit werde, der man sal dy mvyr czu male vf sich legin vnde sin nakebuyr darf ym nicht me den 1½ czigil vbir der erdin vnde des erbis ouch alzo vil an der selbin mvyr geldin; wurde abir der nakebuvyr dy mvir her noch gliche nuczin, so muste her daz vberige beyde an der mvyr vnde ouch an dem erbe geldin; ouch sal eyne durchuart vumf elin wyt behaldin.
10. Ouch sal y der man synen schacht oder heymelich gemach seczen von synis nockebwrs erbe andirhalbe elle, her habe czwischin in sten eyne hulczyne wand, leymwand oder mwir, vmme daz, daz syme nokebůr dovon kein schade gesche, das selbe sal ouch syn von smedeessen vnde von bacouen.
9. Ouch sal y der man, der do mwirn wil, syn gebůde selbir: von vnde syn nockebwr daz syne.
10. Ist ouch, ab ein man buwen wil eyn hulczyn gebwde nebin sins nokeburs gebude, so sal der nokebwr ouch sin gebwde selbir voen vnde der man, der do buwen wil, darf dorczu keyne hůlfe tun.
11. Ouch habe wir ubireyne getragin mit vnsern eldistin in sulchir mazse, welch man eynen gemwerten keler hat uff syme erbe vnd di mwer czumale uff syme erbe lyt, wil denne syn nakebwer mit em mwern uff di selbe mwer, so sal her em di alde mwer vnd ouch das erbe geldin noch achtunge der ratmanne.
12. Ouch habe wir vbir eyne getragin mit vnsern eldestin von des gemuwirdis weyne in sulchir masse, welch man eyne alde muver hat, di do lyt vf syme erbe, wil denne syn nakebuwir doran adir doruff buwen, so sal her syme nakebuwer die selbe alde muwer also lang vnd hoch, als her se nuczczet, halb geldin vnd ouch das erbe nach achtunge der ratmanne.

Actum anno domini m° ccc lxxvıı sabbato ante Thome.