- 217 -

1437 (7. września) Praga, w przeddzień Narodzenia NMP etc.

Zygmunt Luksemburski, cesarz rzymski (niemiecki), król Węgier, Czech, Dalmacji, Chorwacji etc. uwolnił wrocławian od wszelakiej odpowiedzialności z okresu wojennego za działania przeciwko współpracującym z wrogiem etc.

— Wir Sigmund von gotis gnaden romischer keiser, czu allen cziten merer des richsvnd czu Vngern, czu Beheim, Dalmacien, Croacien etc. kunig, bekennen vnd tun kunt offenbar mit disem brive allen den, die in sehen oder horen lesen, als vor czeitten die finde vss Beheim mit iren helfern vns vnd vnsere fursten vnd vndertane, lande, leute vnd gutere in der Slesien vberczugen vnd beschedigten, vnd ouch ettliche slosse und vesten in der Slesien besaczten, inhielten, vnd denselben landen grossen, verderblichen schaden taten vnd czuczugen, vnd als wir davon do czerczeit allen vnd iglichen luten, in welichem wesen die waren, vff das hochste by beheltenuss leibs vnd guds gebuten, das nymands, wer der were, denselben finden eyniche hulffe oder stewer tun noch in spysse, trank oder futer czufuren solte, also bevolhen wir doczumal vnsern lieben getruen, den ratmannen und burgern czu BreslawWrocław vnd andern vnsern getruen in der Slesien, das sy mit machtt dorczu tun solten, soliche besaczten slosser czu gewynnen vnd die finde doruss czu triben, vnd alle die czu straffen vnd czu czwingen vnd czu iren leiben vnd gutem czu greiffen, die denselben fynden hulffe teten mit graben czumachen vnd holcz czufurten, wann nu die vorgenannten von Breslaw vnd andere vnsere getruen in den sachen vnsern geboten gehorsam gewest vnd den nachkomen sind vnd vnsere vnd der lande fynde vnd ire helffer vnd byleger vnd ouch die in hulff, steure vnd czufurung getan hant, angegriffen vnd in soliches gewalts vnd vnczimlicher dinge widerstanden haben mit swere muhe, koste vnd scheden vnd ouch ettwevil dorumb an leibe vnd gute gestraffet hant, dorumb mit wolbedachtem mute vnd rechter wissen sprechen vnd lautern wir, nach dem vnd die obgenanten vnsere getruen von Breslaw vnd andere in der Slesien solichen vorberurten vnsern geboten vnd bevelhnuss und ouch nach gelegenheit der sachen den landen czu notdurfft vnd czum besten nachkomen sind, was sy dorinn mit iren helffer wider die egenanten fynde vnd ire helffer, byleger vnd furderer getan vnd begangen haben mit widerstande, mit angriffung an iren liben vnd gutern vnd brechung der slosse, die sy gewunnen vnd vss der finde henden bracht hant, das sie billich vnd doran wolgetan vnd doran keynen frevel gen ymand begangen hant, vnd wir wollen sprechen vnd seczen ouch, das dorumb dieselben von Breslaw vnd andere vnsere getruen vnd ire helffer sollen nymmer ewiclich angelangt oder angesprochen werden inwendig oder vsswendig gericht, vnd ob doruber icht geschee, das sal kein krafft noch macht haben vnd denselben von Breslaw vnd andern vnsern getruen keinen schaden in eynicheweis. Wir gebieten ouch dorumb allen vnd iglichen fursten, geistlichen vnd werttlichen, graven, fryen banirherren, edeln, rittern, knechten, vogten, houptmannen, burggraven, schulteissen, richtern, burgermeistern, scheppffen, reten vnd gemeinden der stete, merkte vnd dorffere vnd sust allen andern vnsern vnd vnser kunigreichen vndertanen vnd getruen ernstlich vnd vesticlich mit disem brieff, das sy die vorgenanten von Breslaw vnd andere vnsere getruen vmb soliche vorberurten sachen handelung vnd geschicht, die sich von der vorgenanten finden wegen verlouffen hant, nicht anlangen vsswendig noch inwendig gerichts, vnd sie vnd ire gutere dorumb nicht ansprechen, bekummern, hindern, irren oder vffhalden sollen in dheinweis, als lieb eynen yczlichen sy vnsere vnd vnserer kunigreiche swere vngnad czu vermeiden. Mit urkund dicz brives versigelt mit vnseren keiserlichen anhangenden insigel, geben czu Prage nach Cristis geburt vierczehenhundert iar vnd dornach in dem sibenvnddrissigisten iare an vnser lieben frawen abende nativitatis, vnserer reiche des hungerischen et. im einvndfunffczigisten, des romischen im sibenvndczwenczigisten, des behemischen im achtczehenden vnd des keisertums im funfften iaren.