- 038 -

1272 (8. stycznia) Ujazd

Wrocławski biskup Tomasz II. nakazuje proboszczom wrocławskich kościołów św. Maurycego, św. Marii Magdaleny i św. Mikołaja, aby uroczyście ogłaszali fakt nałożenia interdyktu na kościół i szpital św. Macieja etc. Powodem ekskomuniki były incydenty, do jakich dopuszczał się m.in. szpitalny mistrz oraz bracia laiccy etc.

— Thomas, d[ei] gr[acia] ep[iscopus] Wrat[islauiensis], domino Jo[hanni] s[ancti] Mauricii, s. Marie Magdalene et C. sancti Nicolai ecclesiarum rectoribus in Wratisiauia salutem in domino. Cum propter varios excessus in ecclesiam s. Elizabeth et dominum Petrum rectorem eiusdem ecclesie, commissos dominus prepositus et decanus Wrat[islauiensis] ipsam ecclesiam auctoritate nostra interdicto ecclesiastico subiecerint, nos ipsorum sentenciam confirmantes eandem ecclesiam pleno subicimus interdicto. Verum quia in nostre iurisdicionis contemptum post multas moniciones et sentencias antedictas magister et quidam layci fratres hospitalis s. Mathie Wratislauiensis in prefatum dominum Petrum presbyterum inicientes manus temere violentas eum captivum abduxerunt, nos eorum crescente contumacia eandem ecclesiam s. Mathie et totum hospitale eorum ecclesiastico subicimus interdicto sepultura ecclesiastica eis specialiter interdicta. Unde vobis districte precipimus, ut has nostras sentencias proximo die festo vel eciam feriali in ecclesiis s. Marie Magdalene et beate Elizabeth et sancti Mathie vocato magistro et fratribus predictis, sive adesse voluerint seu noluerint, sollempniter publicetis, eorum vero contumaciam et lite pendente volumus et mandamus, ut parrochianis, qui ad ecclesiam sancte Elizabeth pertinebant, per rectorem ecclesie s. Marie Magdalene plene exhibeantur iura parrochialia et ecclesiastica sacramenta, fratrem vero Hermannum presbyterum, qui in ecclesia s. Elizabeth et eciam in ecclesia s. Mathie coram excommunicatis, ut dicitur, celebravit et huius scandali caput est et auctor, in hiis scriptis excommunicamus, nichilominus denunciantes esse excommunicatos magistrum Theodricum armificem, Theodricum sartorem, alium Theodricum, Ottonem et Henricum, Conradum pellificem, fratres eiusdem ordinis et eorum complices, qui manus violentas in sepedictum dominum P[etrum] inicere presumpserint et in dotem ecclesie irruentes res eius cum sigillo et aliis rebus eius abstulerunt.

Datum in Vyazd anno domini MCCLXXII VI Idus Januarii.