- 014 -

1471 (14. lutego) [Wrocław] W czwartek, w dzień św. Walentego etc.

Nadzór nad dotychczas wystawionymi dokumentami królewskimi dotyczącymi bicia monety halerzowej.

— Wir Rudolff von gotis gnaden bischoff zu Breslow bobistlicher legat etc., Jon burggraffe von Donyn, Hieronimus techant zum Brige et tumherre zu Breslow, Francz vom Hag, houptmann der furstenthumer Sweidnicz und Jawor, des allirdurchluchtigsten fursten und heren Mathie kunigs zu Hungern, Behem etc. unsirs allergnedigsten heren sendeboten bekenen und tun kundt uffintlichen mit disem briffe allen die in sehen horen ader lesen, das wir undir andiren seyner kuniglichen gnaden befelhungen mit den ersamen ratmannen zu Breslow von der moncz wegin handelunge gehabt haben sunderlich uff die newen heller, die bisher rendicht geslagen sint am geprech swach und dorumme nicht eyne gute were haben mochten, offte und vil den lewten in iren bewtiln zubrochen und schaden brochten, als wir das wol irkant haben. Dorumme wir an stat seyner kuniglichen gnaden vor das beste erkant und den obgenanten ratmannen befolhen haben, dieselben newen rendichen heller fortmer nicht lossen slahen, sunder slechte heller, die do stercker und bestendiger sein sullen, umb eynes gemeynen nuczis willen, also nemlich das an der uffczal uff die swere Wyner marg newhnczig schillinge heller geen sullen und am korn halden vier loth an eyn quentin feyn silber, dobey die rechenunge gemachit ist, das gleichwol sulcher slechten newen heller czwelff als vil silber haben werden als eyn newer grosche, wanne was an sulchen hellern am korn enczogen adir abbrochen wirt, das wirt am schrot erfullet umb der were willen, uff das sie also nicht leichtiglichen brechen sunder eyne bestendige were haben mochten. Und des zcu geczeugnis haben wir unsire insigile an disen briff lossen drucken, und sunderlich ich obgnanter Jon von Donyn habe den wirdigen heren Jeronimum obgnant techant czum Brige gebeten sein sigil vor mich auch an disen briff lossen drucken, so als ich das meyn nicht bey mir hatte.

Geben am donirstage des tagis sancti Valentini noch Cristi geburt virczenhundert dornoch in dem eynundsibenczigisten iare.