- 078 -

1423 (8. września) [Świdnica], w dzień Narodzin NMP etc.

Postanowienie Rady miasta Świdnicy w sprawie zawiadywania nad monetą emitowaną dla księstw Świdnicy i Jawora.

— Causa civitatis nomine monete. Geschen ist am freitag fur nativitatis Marie anno XXIII, das wir mit gemeynem rate allir unser eldisten zu rate wurden sint als von der CC mark und LXX mark wegin, die man iczunt in der muncze orbert und dorynne legen und die auch von diesem rote dorczu geschikt und mit rote der eldisten darkomen sint von liprente wegin Herman Hemerden, in sulcher mase das dieselben IIc und LXX mark nu furbas mit rate der eldisten zu IIIc marken komen sint und furbasmer nu und ewiglichen bei der muncze bleibin sullin zu nucze und zu fromen der stat, und nemlich den zulauff dovon alle iar ierlichen der stat zu antworten und den zu berechen und nicht das heuptgut anczugreiffen noch an die stat zu legen, sundir also vornemelichen, dasz dieser sitczende rat und mit namen der die muncze und urber von der stat wegin hilde und innehette alz ein rotman, die egenanten IIIc mark irem nochsitczende rate gancz antworten und berechen sulde an gewiszer schulde und furbas alle iar ierlichen ein rat dem andern also zubestellen, das sie von der stat in dheineweis nichten komen noch entwand werden, sundir bey der stat und in der muncze zu bleibin. Und welch rotman der sie innegehalden hette des nichte tete und dem nochsitczenden rate das heuptgut obgenant gancz nichten antworte noch erbarlichen berechnete, der sal das adir seine kinder von seyme eigen erbe und gute der stat dirfullin, das her hette im stadrechte, an allis widirsprechin. Wer abir sache das derselbe rotman der die muncze georbert hette alz von todis wegen abesturbe, do got fur sey, so das seyne kumpan das heuptgut zuvoraus nicht gehabin noch irfinden konden, gleichirweis so sullin deszelbin gestorbin rotmans erbin und kinder das der stat dirfullen aud seinem gute an alle widirrede, dorczu sullin auch die rotman tun und helffin den das geantwort wurden bei irem eyde und irn gewiszen, das das also irfullit wurde und hindirstellig nichten blebe und ire nochkomelinge rotman. Und sulche abgeschrebin sachin seyn wir eyntrechticlichin mit unsern eldisten zu rate wurden sie stete und gancz unvorbrochlichin bey idirmans truwe und ere festiclichen und ewiclichen zu halden und das auch in dheineweis zu widirsprechin und habin das auch in unser sadbuch zu eyme orkunde loszin setczin.