- 022 -

1505 (30. lipca) Buda, w środę przed Uwięzieniem Piotra etc.

Król Władysław JagiellończykWładysław II. Jagiellończyk (cz.: Vladislav II. Jagellonský, węg.: II. Ulászló), król czeski od r. 1471, węgierski i chorwacki od 1490, syn Kazimierza IV. Jagiellończyka. zatwierdza i konfirmuje powyższe porozumienie monetarne.

— Wir Wladislaus von gots genaden zu Hungern Beheim Dalmacien Croacien etc. kunig, marggrave zu Merhern, hertzog zo Lucemburg und in Slesien, marggrave zu Lawsitcz etc. bekennen und thun kundt allermenigliclich, das uns der durchlewchtige furst herr Sigmund hertzog in Slezien zu Troppaw Grossenglogaw etc. beder Slesien und Lawsitz oberster hawbtman und stathalder unser liebster brueder von wegen sein, aller unser fursten geistlich werltlich, darzu prelaten herrn ritterschafften landen und steten der Slesigischen landt glawbhafftigen schein mit ertzelunge, wes schedlichs sich der müntz in denselbigen unsern landen und furstenthumbern erewget, darwider sy gemeinlich bedacht und müntz zu slahen, die leydelich dene landen treglichn und auch allen nutzlichen, zusetzten und verayniget hetten, bittende in soliche new müntzte aus konigelicher oberkeyt lawts desselbigen ihres vertrags genedegelichen zuvergonnen gestatten zu confirmiren zuzulassen und bewilligen. Des haben wir angesehen und bewegt gemeynlich aller derselbigen unsr furstenthwmer landt und lewt nutz ere und bests, darzu betracht irer aller zugenaigten willen, trewe gehorsam dinst, damit sy uns allenthalben zugethan in teglicher übunge beweysen und furttan thun sollen und mugen, darumbe mit wolbedachten muete, zeitigem rate, rechter wissen und willen solichen iren auszsatz und voreynigunge der muntz halben durch bemelte fursten landt und stette beslossen bewilliget und zugelassen, bestett und confirmirt, dieselbigen wir auch also hiemite gegenwurtigclichen verstatten zulassen und bewilligen confirmiren und befesten allenthalben, ob und der von worte zu worte hierinne inserirt gruntlich und gentzlich geschriben und vermeldet weren, setzen und wellen aus konigclicher macht, das sich ein yeder durch dieselbigen furstenthwmer land und gebiet solicher muntz unverandert an schrote und korne, wie und in solichem aussatze klerlichen auszgedruckt, halden soll, bey vermeydung unser sweren straff und ungnad, alles ungeverlich. Zu urkundt mit unserm kunigclichen anhangunden insigel besigelt.

Geben zu Ofen mitwochs vor vincula Petri nach Christi geburt funffzehnhundert und im funfften, unser reiche des Hungerischen im funffzehenden und des Behemischen im vierunddreyssigisten iaren.