- 032 -

1267 (12. lutego) Wrocław

Legat Stolicy Apostolskiej, kardynał Guido, przyzwala rajcom i obywatelom miasta Wrocław, którzy to uskarżali się na to, że ich dzieci zmuszeni są poszukiwania nauki poza jego murami, za zgodą biskupa Tomasza I., dziekana Nikolausa, scholastyka Gerlausa oraz całej kapituły katedralnej, na założenie, przy kościele św. Marii Magdaleny, pierwszej we Wrocławiu szkoły etc.

— Frater Guido, miseratione diuina tituli sancti Laurentii in Lucina presbyter cardinalis apostolice sedis legatus, dilectis in Christo filiis, consulibus et ciuibus Vratislauiensibus uniuersis salutem in domino. Ad nostrum spectat officium, ut quorumlibet subditorum nostrorum et precipue deuotorum quieti et transquillitati prouidere et eorum incommodis precauere, quantum cum deo et iusticia possumus, studeamus. Sane in nostra proposuistis presentia constituti, quod pueri vestri et maxime paruuli, frequentantes scolas extra muros ciuitatis Vratislauiensis, dum ad easdem scolas accedunt, tum propter locorum distantiam ac passus et accessus difficiles, qui sunt in pontibus strictis et fractis super flumina, tum etiam propter multitudinem hominum, curruum et equorum per predictos pontes et uiam frequenter et assidue transeuntium multa dispendia et incommoda substinent non sine magno propriarum periculo personarum. Quare nobis humiliter supplicastis, ut vobis et pueris uestris paruulis in posterum prouidere et contra predicta incommoda salubre remedium adhibere paterna sollicitudine dignaremur. Nos igitur uestris deuotis precibus fauorabiliter inclinati venerabilis patris Thome Vratislauiensis episcopi, Nicholay decani, Gerlay scolastici totiusque Vratislauiensis ecclesie capituli, quos predictum tangebat negotium, assensu super hoc expressius requisito plenius et obtento cum eisdem episcopo, decano, scolastico et capitulo Vratislauiensibus ita duximus ordinandum, scilicet ut infra muros civitatis Vratislauiensis iuxta ecclesiam sancte Marie Magdalene scole fiant, in quibus pueri paruuli doceantur et discant alphabetum cum oratione dominica et salutationem beate Marie virginis cum symbolo, psalterio et septem psalmis, discant etiam ibidem cantum, ut in ecclesiis ad honorem dei legere ualeant et cantare. Audiant etiam in eisdem scolis Donatum, Cathonem et Theodolum ac regulas pueriles. Qui predicti pueri si maiores libros audire voluerint ad scolas sancti Iohannis in Castro Vratislauiensi se transferant, uel quocunque voluerint et eis uidebitur expedire; hoc autem omnino uolumus obseruari, quod scolosticus ecclesie cathedralis, qui erit pro tempore, rectorem in predictis scolis ciuitatis utilem et aptum pueris instituat et prefigat. Nulli ergo omnino hominum liceat hanc paginam nostre ordinationis, concessionis uel constitutionis infringere uel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum.

Datum Vratislauie II idus Februarii, pontificatus domini Clementis, pape quarti anno secundo.