- 060 -
1290 (26. [25.] września) Erfurt.
Niemiecki król Rudolf I. Habsburg nadaje w lenno czeskiemu królowi Wacławowi II. oraz jego następcom wszystkie wolne lenna Rzeszy po zmarłym księciu Henryku IV. Probusie.
— Rudolphus, dei gracia Romanorum rex, semper Augustus, universis sacri Romani imperii fidelibus presentes litteras inspecturis gratiam suam et omne bonum. Licet munificentie nostre dextram ad cunctos fideles, quos Romanam ambit imperium, ex officii debito nobis desuper recommissi porrigere teneamur, maxime tamen illustres principes, qui velut aurora stellis praerutilans virtutum insigniis ceteris prestantiores imperialem gloriam reddunt radiantius illustratam, nos delectat graciosius gratiosa dulcedine prevenire; attendentes itaque inclytum Wenceslaum, regem Boemie, principem et filium nostrum charissimum, utpote bene meritum condignis premiis premiandum principatum Wratislaviense et Slesie, quem a nobis et imperio illustris quondam Henricus dux Wratislaviensis recepit in feodem, necnon omnia feoda vacantia ex morte ejusdem Henrici quondam ducis Wratislaviensis ad nos et imperium pertinentia cum omnibus suis attinentiis, possessionibus, jurisdictionibus et juribus universis, quocunque nomine censeantur, dicto regi Boemie et suis heredibus habenda et possidenda a nobis et imperio tenenda titulo feudali duximus conferenda; si quid autem diminutionis vel calumnie, quod non credimus, circa predicta cavillose, malitiose vel subdole posset opponi, supplemus de plenitudine regle potestatis. In cujus rei testimonium presens scriptum nostre majestatis sigillo fecimus communiri.
Datum Erfordie VI Kalendas Octobris, indictione III, anno domini MCCXC, regni vero nostri XVII.