- 225 -

1360 (29. lutego) Praga.

Karol IV. Luksemburski, cesarz rzymski (niemiecki) i król Czech zezwala rajcom miasta Wrocław, dla wzmożenia jego aktywności handlowej, na bicie złotej monety na wzór tej z Pragi; 2/3 renty emisyjnej przypadła cesarzowi i kamerze Królestwa Czech, natomiast 1/3 rajcom na potrzeby miasta etc.

— Karolus quartus diuina fauente clemencia Romanorum imperator, semper Augustus et Boemie rex, notum facimus tenore presencium vniuersis, et si negociorum varietas, que processibus nostris improuide sepe circumfluit, et nacionum pluralitas, que sub dominii nostri felicitate respiciunt in statu viuendi pacifico, causam nobis continue meditacionis adducant quadam prerogativaa familiaris cogitacionis inducimur et assidua meditacione pensamus, qualiter peculiaris et hereditarii regni nostri Boemie populus, cuius nos specialiter cura sollicitat, cuius est nobis hereditas, omni possessione proclarior sic tranquillitatis profectus et augmenti decore prepolleat, ut sub grato regimine principis augmentis felicibus graciosius augeatur; licet autem ad prosequenda magnifice vota fidelium liberalitatis nostre dextera generali quadam regularitate sit habilis, illis tamen graciosa porrigitur quadam specialitate liberior, quos ad obsequia nostre serenitatis grata continuos fructuosos et vtiles claris semper iudiciis experimur. Sane attendentes multimoda probitatum et virtutum clare merita et singularia constantis fidei et obsequiorum indefessa seruicia, quibus maiestati nostre dilecti nobis consules ciuitatis Wratislauiensis fideles nostri attenta fidelitate se hactenus sedule et laudabiliter exhibuisse cognoscimus, ad presens exhibere sentimus et eos exhibituros se scimus, ut tenentur ex debito propensius in futurum, aduertentesque defectum notabilem fidelium nostrorum in ducatu Wratislauiensi et in locis circumuicinis morancium, quem ex defectu monetarum auri habere noscuntur et ob quod in ipsorum mercibus dampna sufferunt perplurima sicut et hactenus probabiliter sustulerunt, volentes igitur de vberis nostre munificencie gracia speciali dictos consules respicere eiusdemque ducatus Wratislauiensis incolas et eorum circumuicinos innata nobis pietatis clemencia, vt eo melius in suis mercibus proficiant, graciosius consolari animo deliberato, sano principum, baronum et procerum nostrorum ad hoc accedente consilio de certa nostra sciencia et singulari nostre liberalitatis munere presentibus elargimur, quod liceat dictis consulibus in ipsa ciuitate Wratislauiensi monetam auri sub figuris, signis et impressionibus monete auri, que in maiori ciuitate nostra Pragensi fabricatur, aut sub aliis signis et impressionibus ad ipsorum uoluntatem cudere, dum tamen ipsa moneta uero pondere, caractare (!) et puritate in auro ad instar dicte monete auri, que in prefata ciuitate nostra Pragensi cuditur, minime defraudetur, cum omni eo iure et modo, prout cetere monete auri alibi in dicto regno nostro Boemie quomodolibet fabricantur; eo tamen signanter expresso, quod de omnibus fructibus a dicta moneta prouenientibus due partes nobis et camere nostre regia Boemice cedere debeant, quarum duarum parcium perceptores ipsos consules presentibus facimus et de ipsis nobis per eos ad plenum volumus responderi tercia vero parte eorundem fructuum dictis consulibus pro usibus ciuitatis profate integraliter et omnimode remanente; hac gracia ad nostre dumtaxat voluntatis beneplacitum duratura.

Presencium sub imperialis nostre maiestatis sigillo testimonio literarum datum Prage anno domini millesimo trecentesimo sexagesimo, indiccione XIII, II Kalendas Marcii, regnorum nostrorum anno quarto decimo, imperii uero quinto.
Cor. per Miliczium de Cremsir.
R. Johannes.
Per dominum Mindensem
Heinricus Australis.

Por. obok: Schlesiens Münzgeschichte im Mittelalter, Księstwo wzgl. miasto Wrocław, dok. nr 033.