- 289 -

[1374] [Wrocław].

Wrocławski porządek ubraniowy, weselny etc.

— Hec sunt statuta ornamentorum et vestimentorum ciuium Wraczlauiensium tam virorum quam mulierum.
1. Is en sal nymant tragen geuytzte slowir.
2. Nymand sal tragin güldynne, sylberynne adir sydynne mentil, rocke vnd ioppen adir deme glich.
3. Ouch sal nymand geulogilte ermyl an den rockin tragin mit hermyn lassyczczin adir deme glich.
4. Vndene an den rockin mag man wol gebreme habin al vmme dem sowme abir nicht breytir wenne lassiczczin lang.
5. Ouch sal man keyne mentil vssewenyk myt hermyln bebremyn adir bestellin.
6. Ouch sal man keyne mentil noch rocke myt vyperlinbortin vssewennyg belistin vnd ouch wedir kogiln noch hwte adir gurtil. Knowfil mag man wol habin mit vyperlin.
7. Ouch sal nymand wedir man noch wyp sylberynne gürtil tragin vbir vyr marg gewichtis.
8. Wyl abyr ymand daz brechin adir synem wybe adir kindin des gestatin, alz geschribin stet, der sal gebin czu eyme icklichim geschosse vunf mark der stat.
9. Wer ouch hochczit vnd wirtschaft machin wil, der sal nicht mer wenne vunfvndczwenczig schusschiln habin vnd czu ycklichir schussiln nicht mer seczczin wenne vyr man, vrowin adir iuncvrowin.
10. Man sal keyn geld gebin noch ouch nemyn czu allin hochczitin.
11. Ouch sal nymand czu hochczytin adir sust, ouch ab ymand wirtschaft weide habin, nicht mer gerichte habin, wenne vyre vnd eyn mus.
12. Hat her abir ryttir vnd andir vremde geste alz kowflute adir den glich, der mag her phlegin, noch deme alz her vormag.
13. Ouch sullin der brutegam adir dy brut adir des brutegams adir der brut eldirn vnd ouch ere vrunde beydirsyt keyne gabe gebin adir sendin kegin andirr noch mit spyse noch mit tranke, gelt adir andir errunge den glich.
14. Ouch sal der brutegam keyn obynt essin machin.
15. Ouch sal keyn man czu hochczytin dem andirn spillute sendin.
16. Ouch sal der, der dy hochczit adir wirtschaft gehabt hat, noch deme alz dy hochczit vorgangin ist, an dem andirn tage komyn vor dy ratmanne vnd sal swerin, daz her dy vorgeschrebene geseczcze vnd willekor gancz vnd gar gehaldin habin (!).
17. Ouch welde ymand dy willekor vnd geseczcze nicht haldin vnd hochczit adir wirtschaft machin noch synem willin, der sal gebin der stat vunf marg, alz ofte alz her daz breche.
18. Ouch sal ycklich man czu eynem synem kinde czu towfin nicht mer habin wenne dry geuattirn, wer abir des breche vnd dorobir mer geuattim hette; alz manch geuattir, alz manche mark czu bwze dorvmme czu gebin, vnd der bricht, hat her des geldys nicht, her sal dorymme (!) lydin der stat czucht.